“A mauma comu me la ricordu”Nascisti povareddha e te chiamara Abbondanza:
forse ‘cu ‘daventi ricca taniene la sparanza.
Criscisti intra ‘na famija te gente piscatori
e bisugnau ‘cu te trascurane ‘pe le nasse e ‘pe li suri.
Nu ‘te ‘mparasti leggi e ‘mancu ‘cu scrivi,
però li sentimenti, tutti li tanivi.
Eri sempre ‘llecra, puru senza pane,
e nu hai fattu mai male, mancu a nu cane.
Eri surda te ricchia e nu de core
e a tutti nui nde ‘mparasti l’amore.
Te visciu ‘nfacce la pila quando gia stracca stricavi
e susu la turre le rrobbe spandivi e poi stiravi.
Te visciu ‘cu le menze quando scivi a la funtana
e ‘nchivi lu pisari ‘cu bivimu na samana.
Te visciu ‘cu la carralora e cu lu cuppinu ‘mmanu
quando menastravi nove piatti ca spartivi chianu chianu.
Te sentu ‘ncora quando cuntavi sula
tandu, ca te ogni cosa te vania la ‘ngula.
Te sentu ‘ncora ‘cu le pantofule strascianare
quando te zzavi te notte e nde vanivi ‘ngucciare.
Te sentu ‘ncora ujrisciare
quando a occhiu ‘zzaccavi cantare.
Moi ca nu ‘nci sinti cchiui e jeu ca stau luntanu
te tegnu intra ‘lu core ‘zzaccata ‘ppe manu.
“Caddhipuli”Nu ‘se sape ‘ncora ci tave genaratu:
ci tice li Messapi, li Creci, li Romani;
mo ‘be ticu jeu propriu cinca è statu
senza ‘crititi ‘cchiui a machi o a pacani.
Quando lu Patreternu fice lu Creatu
e mentre sistemava dhu casinu,
nu ‘nziddhu te sutore ‘mprofumatu
se trasfurmau a nu scoju curaddhinu;
ca se ‘nturnisciau te beddhe mamme sirene,
scazzacate te soni balli e canti
ficiara ‘nzumare: scorfini, cernie e murene
e se ‘ncantara tutti li navicanti.
Te nanzi a tutti dhi ‘baddhizzi
se ‘mpizzacau lu focu te l’amore:
nascira l’angialieddhi ‘cu li capiddhi rizzi,
ca erene beddhi te facce e beddhi te core.
Kalèpolis li Creci te chiamara,
paese beddhu è lu significatu,
“baddhizzu ca ddarlampi comu na perna rara”
Caddhipuli, poi, si statu ‘battezzatu.